Iалий-Юртара гимнази яьккхар, дика дешаш чакхваларах, белгалвир Мехкадас
Iаьлий-Юртара гимнази дика дешаш чакхъяккхарах, из белгалвеш дола хьарак (знак) делар мехкадас Келаматанаькъан Махьмуд-Iаьлас зIамигача сага. Из хоам «Сердалога» бир гимназера.
«ТIехдика гимнази чакхъяккхарах дошо майдилг елар Сукенаькъан Рашида. Ше дешача юкъа дуккхача олимпиадашкара, Россе йоккхача яхьашкара гимназенна котало кхихьар цо. ЕГЭ дIалуш 250 балл гаргга хилар цун, эрсий мотт - 81, математика - 80, физика - 88», - белгалдир гимназе.
Цун хиннача цIихезача хьехархочо Томбенаькъан Марема аьнначох, дешара геттара тIакхувш, цунца чам болаш, чакхваьлар Рашид.
«Дешара тIехьа чIоагIа къахьегаш, шийна дезачунга кхача гIерташ, хиннав из. Ерригача ишколо доаккхал де мегаргдолаш, дешархо вар. Иразе, аьттув болаш, беркате хилба цун дIахора вахара никъ!» - дийцар хими хьехаш хиннача хьехархочо.
