ГӀажарий-Юртарча № 3 йолча ишкола 9-гӀа, 11-гӀа классаш яьхараша аттестаташ хьаийцар
Аттестаташ хьаэцаш лоархӀаме кхетаче хилар, ГӀажарий-Юртарча № 3 йолча ишколе. Цига гулбелар берий дай-ноаной, хьехархой, юртара депутаташ. Из хоам «Сердалога» бир «ЦаӀ йола Росси» яхача парте доакъашхоша.
«Кердача наькъ тӀа гӀа боаккхаш вола 35 саг вар ийс класс яккхарах дола аттестаташ хьаийцараш. Иштта цу ишколера укх шера араваьлар 11 класс яьккха 14 саг. Къаьстта йоккха терко йир тӀехдика дешаш чакхъяьннача 9-ча классерча 3 йиӀига, дошо майдилг йоаккхаш дешар чакхдаьккхачунна, иштта дото майдилгаш еннача кхаьннена», - дийцар тха газетага.
«Таханарча аттестаташа хьагойт шоай дешара никъ оаш дика дӀабихьалга, цар хьабелл шоана хьалхашка керда никъ. Вахаре шоашта накъадаргдола, пайда хургбола гӀулакх хержа, дӀахо тӀехдика къахьега аьттув, низ хилба шун!» - аьлар къонача тӀехьенга къамаьл деш «ЦаӀ йола Росси» яхача парте моттигерча кхела хьалхалаттача ГӀулой Анжелас.
