Ишкол яьккхараша аттестаташ хьаийцар
01.07.2024 13:05
Эггара хозагӀа йола бера ха чакхъяьлар выпускникашта аттестаташ дӀадаларца, из кхетаче укх деношка ГӀалгӀайчен юкъарча дешара моттигашка дӀайихьар.
«Массанена йола паччахьалкхен экзамен (ОГЭ), цаӀ йола паччахьалкхен экзамен (ЕГЭ) хӀанз тӀехьашка йисар. Къаьстта из ха дика чакхъяларо таро елар 9-ча, 11-ча классай дешархошта дийша балара каьхат хьаэца. Иштта Наьсарен кхален Ӏаьлий-Юртарча гимназе аттестаташ дӀалуш, лаьрххӀа йола кхетаче хилар.
Вахаре уж накъабоахаш, цу дешара моттига кулгалхочо Дибаранаькъан Заремас тӀеххьара дешаш аьлар; шоай дикагӀа йола оамалаш лораеш, халонаш тӀехьаюташ, майрра шоай вахар дӀадахьа аьттув хилба шун, аьнна.
Дикача наькъ тӀа хилда шо, выпускникаш!
