Башкортостанерча лакхарча ишколаша вай мехкацара бувзам чӀоагӀбир
![Башкортостанерча лакхарча ишколаша вай мехкацара бувзам чӀоагӀбир](http://serdalo.ru/storage/OlZw9sMw7PMwUctvYawv2rAHkJ5WIW72sD5Zndmo.jpg)
Вай республикерча Паччахьалкхен университетаца бувзам чӀоагӀбеш долча каьхата кулг яздир Башкортостанерча паччахьалкхен балхах йолча академе болхлоша. ЛоархӀамеча каьхата кӀала кулг яздир шаккха оагӀорахьарча дешара моттигий ректораша, Абдрахманов Данияра, Ӏалбаканаькъан Фатимас.
«Башкортостана кулгалхо юкъелоацаш, вай мехкарча университетаца БАГСУ баь бартчӀоагӀам шаккха оагӀорахьа лакха говзал йола болхлой арахецаш, пайда беш дола гӀулакхаш доаржадеш хургба. Ӏомадаьр дӀа-хьа эцаш, хьехархой, тохкама болх дикка тоабеш, цхьана беркате хургйола тайп-тайпарча оагӀонцара кхетаченаш йоаржаеш къахьегаргда шинна оагӀон болхлоша», - дийцар «Сердало» газетага республикерча паччахьалкхен университете.
Башкортостана, вай мехка чӀоагӀа лоархӀаме ба из бартчӀоагӀам. Юкъера бувзам чӀоагӀбеш, шаккха республикера дешара, Ӏилман хьал тоадеш, хургда из гӀулакх.