Вай даьша леладаьраш довзийташ бола гойтам ба Наьсарерча музее
«ГIалгIайчен лоаман фусамаши вахари» яха Мерешканаькъан Султана гойтам ба, Наьсарерча Малсаганаькъан Тухана цIерах йолча музее. Лоамарой вахарца дувзаденна дола лоархIаме, селханара денош хьагойташ дола балхаш да цига хьокха оттадаь. Вай даьй вахар мишта хиннад, малагIа тайпа хIамаш лелаеш уж баьхаб, го йиш я музее.
«Къаьнарча хана гIалгIаша лелаяь тайп-тайпара хIамаш йовзаргья гойтаме баьхкарашта. Вай селханара истори, цунца дувзаденна дола лоархIамедараш къаман юкъера дIа ца далийтара тIехьа дIахьош боккха болх ба ер», - дийцар «Сердалога» музея болхлоша.
Из лоархIаме къахьегам кийчбаьча автора дийцар, вай къаман наьха селханарча вахара деноех, Iадатех, оамалех, гIалаш йотташ хиннача цIихезача къахьегамхоех, цар говзалах. Иштта йола кхетаченаш чIоагIа лоархIаме я къаман культура, истори лорадара тIехьа.
