ГӏалгӀайчен МКЖР гойтамаша дувцаргда цӀихезача нахах
ГӏалгӀайчен къам мехкахдаккхара дагалоаттама Мемориала комплексе лайчилла бетта кхетаченаш дӀахьоргья, цӀихезача наха хетаяь. Кагирхой таро я цига баха «Пушкински карта» яхача программага гӀолла, мах боацаш. Карта тӀа ахча хьадайтаргда паччахьалкхено: хьахаржа еза культуран кхетаче, картага гӀолла билета ахча дӀадала деза.
«Вай кагирхой хьажа йиш йолча гойтамех ба «Къовсам, дукха дезар Ӏоахарганаькъан Гӏапура», из видеогойтам хетабаьб гӀалгӀай революционер ваь 135 шу дузара, иштта гойтам ба Россе Турпал Котанаькъан Ахьмад ваь 65 шу дизара хетабаь», - аьлар «Сердало» газетага ГӏалгӀайчен политически Iазап лайнача наьха сийленгий моттиге.
Гойтамаша дувцаргда цӀихезача наьха оамалех, вахара наькъах, цар халача ханашка гойтача деналах. Из дика таро я уж дагалаца.
