НАТО бӀухошкара хьадаьхача цӀеташка хьожаш ба Магасерча гойтаме
Болх беча моттигашкара бӀарчча тоабаш ух, тӀема операцен юкъе Россе бӀухоша НАТО оагӀонгара хьаяьча тӀема машинашка, кхыйолча хӀамашка хьажа. ТӀема юкъе хьадаьккхача герзага хьажа баха хилар гӀишлошъяра балхех йолча Министерствон болхлой, цу оагӀон хьалха латтача Иленаькъан М. Из хоам «Сердалога» бир цу моттигера.
«Низ бакъхиларца - котало» яхача хьалхаленца дӀахьош я берригаш тӀалатташ йола из кхетаче. ТӀема юкъера араяьккха 18 машин я цига хьокха оттаяь», - йоах хоамо. Ший къамаьла юкъе премьер-министр волча Сластенин Владимира хьоахадир, геттара чӀоагӀа хестаеш хиннача малхбузен тӀема машинех Россе бӀухошта духьала нийсъелча аьшках баь гув хьахиннилга. ЗӀамига, боккха - дукха адам да цу гойтамга хьажа ухар. Шоай дезалашца ух бахархой цунга хьажа. Аьшках яь гурмат хинна, йохаяь латтача танкашта, тӀема машинашта бӀарахьежаш, Даьхен гӀулакх лораде массахана низ болаш, яхь, денал долаш хила везилга кхетаду. Цига дакъа лоацаш ба иштта филармоне болхлой, ГӀибухерча тӀема куран халхара, илле ансамбль.
