Гӏалгӏайчен гойтамаш деча фусаме, ширача заман гойтам кхолларгба
Гӏалгӏайчен гойтамий фусаме «Цӏа. Дезал. Ха. Гӏалгӏайче 19-20-ча бӏаьшерашка хиннача хӏамашка гӏолла» яха боккха гойтам хьакхолла лерхӏ, цу гӏулакха лаьрххӏа гулдеш гӏирсаш да. Цу проекто тӏахьех дакъа лацара мехка культуран тӏехьале лораеча, иштта ши бӏаь шу хьалха хинна гӏалгӏай хӏара деннара вахар, дагалоаттама оагӏонаш, ӏадаташ сомадахара.
«Проекта чудоагӏаш да дӏадахача ноахалаша ши бӏаь шу хьалха леладаь вахар, дезалашкара архиваш гойтар. Хӏара денна дӏадодача вахара оагӏонаш гойташ даьха хинна сурташ, къаьнара архитектура, къаман барзкъа, цӏагӏа леладаь хӏамаш, ӏадатий гӏирс, доалахьара каьхаташ, моллагӏа дола сага вахарах лаьца йоазув тӏадола каьхаташ хилар лоархӏаме да», - аьлар «Сердало» газетага Гӏалгӏайчен культуран, туризма Министерстве.
Гӏалгӏай цӏен дукхача оагӏорахьара истори - къаман культуран керттера цхьа овла ба. Вахаре леладаьча гӏирсашка, белггаларча каьхатий тешалашка гӏолла гойтам кийчбераш лаьрхӏа ба дӏаяхача заман вахара сурт хьакхолла.
Гойтам хургба къаьнарча вахара гӏирсаш гойтарал совгӏа, къамаьла овла а бовзийташ. Хӏара гӏирса даькъ тӏа дувцаргда даьй вахара оагӏонаш йовзийташ дола къамаьл.
