Токмакски кхалерча шоай ханнарбарий оагӀув хьаллаьцар мехкарча къонача эскархоша
10.08.2024 17:00
Токмакски кхален моттигашкарча дешархошта ишколе дӀачуболхаш эшаш йола хӀамаш гулйир вай мехкарча къонача эскархоша. Запорожски областе кастта Ӏокхоачаргда, совгӀатех дизза дола тӀормигаш. «Сердалога» из хоам бир дешареи Ӏилмани гӀулакхех йолча министерстве.
«Из беркате болам хьаллаьцар МагӀалбикерча № 18, СоагӀапчарча № 30, Долакоарча № 7, Наьсарерча № 6 йолча ишколашкарча дешархоша, иштта Магасерча, Ӏаьлий-Юртарча гимназешкарча бераша», - йоах тхога бенача хоамо.
Къаман фронтага хьалхале йолаш дӀахьош ба из болам вай мехка. ПаргӀатта шоай дешара шу доладе аьттув ба хӀанз Токмакерча берий.
