Къона артисташ илли оалаш, халха бувлаш ба Оалкамарча хоржамий даькъ тӀа
10.09.2023 16:45
ГӀалгӀай Шолжа кхален Оалкамарча культуран цӀагӀа кхоллама коллективо № 12 йолча хоржамий даькъ тӀа концерт делар. Шоай хьинарца Ӏомабеннача артисташа юртхой гӀадбигар хозача ашарашца, иллешца, лезгинка оалача халхарца.
«Вай республикан муниципальни даькъ тӀа депутаташ хоржаш дӀахьу цаӀ дола хоржамий ди, вай бахархоша укх гуйрана лоархӀаме политически ди санна тӀаийцар.
Тха безам хилар цига хьабоагӀаргболча вай мехкахошта из ди дицлургдоацача тайпара де, из иштта вӀаштӀехьадаккха таро хилар, вай кагирхой начӀал хиларах. Къонача артисташа, дег чура раьза болаш, вай мехкахошта лаьрхӀа хоржама ди иллешца, ашарашца, халхарца дӀадихьар», — аьлар «Сердало» газетага Оалкамарча культуран цӀагӀа.
