«Шахьара №1 йолча ишкола гӀишлон чу «Къона кхолламхо» яха шоллагӀа муниципальни яхь хилар, из хетаяь яр ГӀалгӀай паччахьалкхен 100 шу дизара. Из вӀашагӀъеллар яр Илдарха-ГӀалан мэри; иштта, моттигерча «Хьалхарчар Болам» яхача даькъо хьал а лоацаш, дешара моттига администраци», - аьлар хоамо.

Кагийчарна фу карагӀдоал хьожаш, цу тайпара болх хӀара шера дӀахьу «Кагирхой политика дегӀайоалаяра» йолча муниципальни программага гӀолла. Цо таро лу ондаргашта, берашта кердадараш Ӏомаде, дӀахо дегӀааха, кердадараш юкъедаха, Ӏилман кӀийле йовзара гӀулакха шоашкара дакъа юкъедахьа.

Кхувш боагӀараш Ӏомалу, из бахьан долаш, дикагӀа гонахьардар довза, наха эшаш дар юкъедаккха.

ЛоархӀаме да цу тайпара яхьаш дӀаяхьар, ГӀалгӀай Республикан хӀара юрта. Вай дукха ба шоаш хьалаьцар кхоачашдеш, хӀамах дика кхеташ бола кагирхой.

Яхьа доакъашхоша гойтар, шоаш хьадеш долча хӀаман безам тӀабодаш, цох дика кхеташ, хьисап долаш хилар. Цу тайпара, яхь йистейоалаш, белгалбаьлар «Инновационни продукт» - Йовлой Ислам (№1 йола ишкол), «Ловзараш вӀашагӀдохкар» Шовхаланаькъан Хьава (№5 йола ишкол), «Роботатехника» - ЧӀасанаькъан Мухьмад-Басир (№1 йола ишкол-гимнази).

ХӀара даькъ тӀа кхоккха дикагӀа бола болх белгалбаьб дипломашца, дезача совгӀаташца.