Къона ашархо кийчлуш ва, Ерригроссийски берий Фольклориадага
ГӀалгӀай къона ашархо Овшанаькъан Ӏаддал-Гафур кийчлуш ва аьтинга бетта Казане дӀахьоргйолча Ерригроссийски Фольклориаде дакъа лаца. Татрий мехка столице гуллургда Россе эггара чӀоагӀагӀа начӀал дола бераш, уж да халкъа иллеш, ашараш, халхараш Ӏомадеш чуийнна къахьегараш.
«Ӏаддал-Гафур къаьнара гӀалгӀай дахчан пандар безаш ва. Из кӀаьнк дика вовзаш ва гӀалгӀай хьажархошта, хӀаьта из хӀанз Ерригроссийски берий Фольклориаде ваха кийчо еш ва. Цунна новкъостал ду халкъа артиста Оздой Адама. Из иллиалархо хинна а ца Ӏеш, начӀал дола фатанча ва, цо ший хана Горчхананаькъан Мухьмада халкъа инструментий оркестре болх баьб», - аьлар «Сердало» газетага ГӀалгӀайчен цӀихезача артистка хиннача Йовлой К.А. цӀерагӀча Республикан халкъа кхоллама цӀен художественни кулгалхочо Абдурзаканаькъан Аьсета.
Белгалду, шоллагӀа Ерригроссийски Фольклориада дӀайолаеннай Казане, аьтинга бетта 19-ча дийнахьа, из хургья аьтинга бетта 23-ча денга кхаччалца. Ӏаддал-Гафур гӀоргва татрий мехка ший хьехамчаца, Илдарха-ГӀалий тӀарча искусствай берий ишколе хьехаш волча Оздой Башираца. ГӀалгӀайчен викалашта керте хургья АбдурзаковгӀар Аьсет.
