Илдарха-Гӏалий тӀа 9 шера дукхагӏа нах тӏалатта 48 моттиг тоайир
2016 шера денз, «Шахьара дика хьалаш хьакхоллаш» яхача федеральни, иштта «Вахара хьалаш тоадар» яхача къаман проекташта чудоагӀаш Илдарха-Гӏалий тӀа 48 юкъарлон доазонаш тоадир. Из хоам «Сердало» газетага бир администраце зарбан болх лелабеча Кхорахой Мурада.
«Наха дика дакъа лацарах, Ӏаьдал а кийча хиларах; доал деча даькъ тӀа 39 юкъарлон, 9 коашкара моттигаш тоае, лостам бе вӏаштӏехьадаьлар. Духхьал дӀадахача шера мэре шийгара 4 моттиг кийчйир. Градусова урамах жагӀа иллача асфальт биллар. Цу хьалаша таро елар цун уллуврча республикански наькъ тӀара машинаш лелара хьал аттача даккха. Цул совгӀа, шин урамах - Джабагӏанаькъан, Бочаланаькъан - гӀашлошта лаьрхӀа наькъаш даьхкар, цудухьа хӀанз дешархошта а аттагӀа да укх юххерча ишколе аха», - йоах хоамо.
«Теша хала да, кхыметтел дукха ха йоацаш, укхаза уж хьалаш доацаш хиннилга дагадехача; оалаш ма хиллара, диканга сиха дӏаӏамаш хул. Юкъарлон доазонаш тоадара йола программа дика болх беш я моттигера хьал дегӀадоаладеш, дукха ха йоацаш, из тӀехьадусаш дар. Хӏанз из деррига накъадоалаш да бахархошта», - аьлар, шийна цох хетар дувцаш, Илдарха-Гӏалан кхела доакъашхочо Султиганаькъан Ӏарбе.
