Полице болхлой хиннарашта суд ергья
ГӀалгӀай мехка, суда хьалхашка оттаргба хьалха бокъонш лораерий моттиге балха хиннараш, шоай балха тӀа кхааш ийдаь хиларах, яхаш, дувц «Сердало» газетага ГӀалгӀай Республикан тӀахьожам лоаттабераша.
«Лоткъам ийцараша яхачох, 2023 шера ардара бетта 5-ча дийнахьа, Россе МВД «Малгобекский» МО болхлоша, шоай болх дӀахьош болча хана, «Маяк-11» яхача полице тӀахьожама ха тӀа соцавир, наркотикаш лелаеш хиларах дегабуам беш ва, аьнна, цхьа саг. Шоаш из полице Ӏочувигача, цар цунна йийттай», - йоах республикан прокуратурерча хоамо. Цул совгӀа, цу наха шоаш хьалаьцача сагага гӀелал енай; доацаш долча хӀаманна дари де, яхаш. Цо шоаш яхар дергдоацилга хайча, 1,9 млн сом мах бола цун квартира доалахьара яьккхай, йолча даь кара хӀама доацаш.
Россе УФСБ болхлоша, иштта ГӀалгӀай Республике гӀолла йолча Россе МВД хьем боаццаш дола гӀулакхаш дика чакхдахарах, цу зуламхой гӀулакх юхатехар. Уж нах хӀанз набахта чубехка боахк, цар зуламе гӀулакх дӀадахьийтад ГӀалгӀай Республикан Магаса кхален суде.
