ГӀалгӀайчен бахархой лоткъамаш теркама юкъеийцад УПЧ
ГӀалгӀай мехка молхашца, наха лорий дарба дарца дувзаденна сага бокъонех вола викал волча ЦӀечой ИбрахӀимга хьадийцар цига хиннача наха шоай хьал. УнахцӀенон министра гӀонча йолча Настайнаькъан Амината, лорий страховане даькъ тӀарча ганза кулгалхочо Зурабанаькъан Тамарас дакъа а лоацаш, дӀайихьар ювцаш йола кхетаче.
«Гулбеннарашта дийцар цар бокъонех, царна ха дезарех.
Наьха лоткъамаш ший теркама юкъеийцар сага бокъонех волча викала, уж цо тохкаргда законах доаггӀача беса», - аьлар «Сердало» газетага ГӀалгӀай Республикан сага бокъонех йолча фусама хоамий-аналитически даькъ тӀа.
ЦӀечой ИбрахӀима цу дийнахьа Настайнаькъан Амината «ГӀалгӀай Республике сага бокъонаш лораярах» яха майдилг елар, цунна наьха унахцӀено лораяра даькъ тӀа карагӀдаьннар теркалдеш.
Наьха унахцӀено лораяра лоархӀаме да царна эшаш дола лорий новкъостал лоаттадар, массаболча наха из дӀакхоачаш, ший ханнахьа дикал йола лорий гӀо хилар. Лораша лораде деза нахаца безаме хилар, эздела боарам ца боабеш, унахочун лерхӀам беш хилар.
