Ший болх дикка тоабеш я «РИАК» завод
Ше арахецаш бола кхоачам дикка лакхбаьб вай мехкарча кӏалах хӏамаш хьаеча «РИАК» заводо. 2024-ча шерара болх хьалха хиннача шерга диллача, 11%-га кхоачаш лакхагӏа ба; 9, 2 эзар тонн гӏирс ба цига арахийцар.
Мехкадаь зарбан болх лелабераша белгалдечох, заводо арахецаш йола хӏамаш СКФО регионашка санна, Краснодаре, Юкъерча Россе моттигашка лоаттаю. Иштта СНГ мехкашка, Гӏуозлой мехка, Белоруссе дӏакхухьаш я тахан вай заводера хьаю хӏамаш.
Завода моттигаш дикка дӏашеръеш, проект я тахан йоаржаеш, 11 эзар тоннага кхоачаш хӏамаш арахеца йиш хургйолаш, хувцамаш деш боахк цига. Укх пхе шера цхьацца кердадараш юкъедоаладеш, къахьегаргда цига. Тахан завода хьалхашка латта керттера декхар - болх дӏабахьа керда гӏирсаш эцар. Шера 18 эзар совгӏа хӏама арахеца йиш хургйолаш тоаде гӏерт завода хьал.
Мехкадас цу гӏулакхах лаьца ший бувзама оагӏонашка язду: «Болх тоабара юкъе да арахецаш бола кхоачам лакхача боараме, дика хилар. Республикерча бахархошта болх бе 50 моттиг луш хургда уж хувцамаш».
