Мехкарча «РИАЛ» яхача заводо, 30% - га кхоачаш, айдаьд арахецаш дола хӏама
Iаьлий-Юрта уллаш йолча «РИАЛ» яхача заводо хьадер дикка айлуш латт. 30%-га кхоачаш дукхагӏа арахецаш ба уж шоаш хьадер. Из хоам тхога бир Мехкадаь зарбан болх лелабераша.
Дӏадахача шерара хьал теркалдича, заводо хьабаь пайда 1,5 млрд сом ба, хӏаьта арахецаш дола хӏама 10,1 эзаргара 13,1 эзар тоннага кхоачаш айденнад. Россе массайолча моттигашка хӏамаш лоаттаеш я из завод тахан.
Вай мехкадас Келаматанаькъан Махьмуд-Iаьлас белгалдир, Къилбаседа Кавказа моттигашка эггара хьалха хьайийллача лоаладаьча аьшках хӏамаш хьаеча «РИАЛ» завода хьал дикка айлуш латтилга. Заводо арахецар тахан массайолча моттигашка эшаш, дӏакхухьаш да.
«Шера 10 эзар тонн хьаяь хӏама арахецаргья, аьнна, оттадаьдар юххьанца; бакъда укх тӏехьарча массехк шера завода цу оагӏонцара хьал дикка айденнад», - белгалдир Мехкадас.
Кӏалах хӏамаш хьаеш, боккха болх дӏахьош йола вай мехкара завод дикка дӏаяйза, лакха тешал долаш я арахьа.
