Гӏалгӏайчен вахархо бехкеву, герз юкъедоаккхаш, йоккхий човнаш ярах
01.10.2025 13:13
Гӏалгӏай мехка чакхбаьккхар Арште 48 шу даьннача сага духьала дӏахьош хинна тохкама болх. Из бехкеву, цо чарахьал деш дола герз юкъедоаккхаш, сага лаьрхха човнаш ярах, яхаш, дийцар «Сердало» газетага цу боахаме.
«Тохкамхоша яхачох, 2025 шера кӏимарса бетта 21-ча дийнахьа сарахьа ший коа юкъе 22 шу даьннача гаргарча сагаца дов даьннад цун. Бокъо йоацаш лелаеш хинна топ теха, цо из лозаваьв. Чов йоккха хилар», - йоах хоамо.
Судо баьча соцамах из саг хӏанз лаьца воалл. Беррига тохкама болх дӏабихьаб, из гӏулакх суде дӏадахьийтад.
