Ши банка поатронаши дӀандарги дӀаелар полицега вай мехкахочо
30.07.2024 10:19
Ачалкхерча полице болхлошка, 839 поатронах йизза йола кхо кхийла йода ши банкеи дӀандарги дӀаелар цигарча вахархочо. Цо дийцачох, уж хӀамаш кхелхача даь хинна я, коа кулг тохаш воаллаш, кораяьй уж цунна.
«МВД экспертни-криминалистически оагӀонга дӀаеннай уж хӀамаш», - дийцар «Сердалога» Ӏаьдала болхлоша.
МВД викалаша бахархошта хьалхадоаккх, хӀара сага, шийгара герз дӀадихьа, Ӏаьдалга дӀачудала аьттув болга. Цу гӀулакхо судах кӀалхарвоаккх саг, цул совгӀа, герз дӀачудаларах ахча а лу. Бокъо йоацаш цӀагӀа герз леладераша ма хулла сихагӀа из Ӏаьдалга дӀакхачийта деза.
