«Турпалхочун Да» яхача гойтаме дакъа лаьцар вай мехкахочо
23.10.2024 16:02
Россе Паччахьалкхен Думас хьалхале лелаеш, дIабихьача «Турпалхочун Да» яхача гойтаме дакъа лоацаш хилар вай мехкахо, СоагIапча вахаш вола Боканаькъан Къурейш. Из хоам «Сердалога» бир «Даьхен лорбой» яхача ганза филиала кулгал деча Новрбенаькъан Фаринас.
«Москве дIабихьача гойтаме хьокха оттадаьд СВО доакъашхой даьй 38 сурт. Подполковник хиннача Боканаькъан Мустафай да хилар цига, вай мехкара ваха. Ший виIий сурт бедоаллаш латт из. ТIема операцен юкъе хилар из 2022-ча шера. Эпсара кулгал деш, дукха юрташ, шахьараш мукъаяьхар цига. Лакха майрал, денал гойташ лаьттача вай мехкахочун вахар хаьдар цига. РФ Президента амарца Россе Турпала седкъа белар цунна», - дийцар тха газетага.
