Магаса вахархо Ӏехавир зуламхочо
Тешаш вола Магаса вахархо, кхычахьа вахача зуламхочо Ӏехавир. ХӀама нахалдоаккхача йоазонга гӀолла, «Ветерок-8М» яха гилакема эца безам болаш хиларах, цо доадир 11эзар 300 сом.
Шийга из ахча хьакхаьчачул тӀехьагӀа, цу сага бувзам хоадабир, цул тӀехьагӀа ше малав ца ховча сага Ӏехаваь хилар кхетадаь, ГӀалгӀайчен столицан полице даькъ тӀа вера республикан вахархо.
«Магаса полици лохаш я онлайн-мах баь саг. Цу сага РФ УК 159 ст. зулам даь хилара бехк бергба. Оаха хьалхадоаккх вай бахархошта, малав ца ховча сагаца цхьаккха мах бара гӀулакх ма леладе. Шоай каьхаташ тӀара хоам царга дӀа ма кхайкабе, банковски карта тӀара реквизиташ а дӀа ма тела»,-аьлар «Сердало» газетага ГӀалгӀай Республике гӀолла йолча МВД зарбан болх лелабераша.
Нагахьа санна шоаш зуламхой тийшача балха юкъе нийсденнадале; сиха хоам бе цох, зуламхочо лелаеча телефона номерах, социальни бувзамий аккаунтах, е электронни почтах.
