Магаса вахархо лаьцар, лаьттанца куташ лелаеш хиларах
Магасе хьалаьцар 48 шу даьнна ГӏалгӀай Республикан вахархо, цо доккха зулам леладеш хиларах дегабуам беш. Уголовни гӀулакх хьадийллар къаьстта лорахӀаме гӀулакхаш тохкаш йолча Российски Федераце Тохкама комитета ГӏалгӀай Республикерча урхаллено, яхаш, дийцар «Сердало» газетага цигара зарбан болх лелабераша.
Тохкама материалаша яхачох, 2019 шера лайчилла бетта денз 2022 шера лайчилла беттага кхаччалца, зуламхочо доалахьен а лаьттан а хьалех йолча ГӏалгӀай Республикан Министерстве харцахьара каьхаташ чуделар, ше арендах хьаийцача лаьттан тӀа йистедаланза гӀишлон балхаш хиларах - лардаш.
Зулам дара бола болх чакхбаккхара цо юкъеваьккхав кадастра инженер, хӀаьта цо, цига дӀа а ца водаш, технически план оттайир харцахьарча каьхаташта.
Уж каьхаташ хилар бахьан долаш, 2022 шера лайчилла бетта 23-ча дийнахьа доалахьен а иштта лаьттан а хьалех йолча ГӏалгӀай Республикан Министерствон, иштта бехкевеш волча сага юкъе эцара-дохкара чӀоагӀо йир, лаьттан чухьнахьа болча маьхах - 436 290 сомах, из деррига а 20% дар кадастра маьхаца дистача. Лаьттан мах бар 2 миллион сом.
Дӏахо бехкевеш волчо, харцахьа даьха каьхаташ леладеш, из лаьтта эцара бокъо чӀоагӀйир ГӏалгӀай Республикан паччахьалкхен регистраце федеральни гӏулакха кадастра, иштта картографе урхаллене.
Цу тайпара зуламе гӀулакхаш леладеш хиларах, доалахьен а лаьттан а таронех йолча ГӏалгӀай Республикан Министерствонна зе дир 1 700 000 сома.
Карарча хана из лаьца воалл РФ Уголовни процессуальни кодекса дӏадехачунга хьежжа. Тохкамо йоах, лаьца воаллачоа духьалара гӀулакх хьаделла из чуволларах.
Уголовни гӀулакха тохкама болх дӀахьош ба, деррига зулам гучадаккха, иштта юридически мах оттабе гӀулакхерча наха а, цу юкъе дакъа лацарах.
Уголовни гӀулакх хьадийллар, ГӏалгӀай Республике гӀолла йолча Россе УФСБ хьаяйтача материалашка хьежжа.
