Хьалъе йӀаьхъенна гӀишлош кӀезигагӀа хилийта гӀерт мехка
ГӀишлошцара бӀаьхбенна латта болх меттаболабеш къахьег тахан вайцига. Наьсарера № 3 йола ишкол, Шолжа-Шахьарера поликлиника хьалъеш бола болх ба тахан чакхбоаккхаш латтар. Цох лаьца «Сердалога» дийцар мехкадаь зарбан болх лелабераша.
2018-ча шера болабеннаб ишкол тоае, поликлиника хьалъе. Ер бутт чакхбалалехь, кийча хила езаш я шаккха моттиг. Тоаяьча ишколо тӀаэцаргва 1600 дешархо, хӀаьта поликлиника 300 саг дийнахьа тӀаэца йиш йолаш хургья.
Поликлинике хьаелларгья хирургически, травмотологически моттигаш, таханарча хано дӀадеххача тайпара долча гӀирсашца тоаяь хургья из.
Вай мехкадас Келаматанаькъан Махьмуд-Ӏаьлас белгалдечох, уж балхаш гаьнадалара бахьанаш тайп-тайпара да - санкцеш бахьан долаш гӀишлон балхаш дӀадахьа эшаш болча кхоачама маьхаш айдалар, пандеми, иштта кхыдараш а.
«Мехка Паччахьалкхено боккха болх чакхбаьккхаб, тӀехьаюса моттигаш боаггӀача боараме тоаяь йистеяргйолаш, цу гӀулакха эшаш дола рузкъа 100% лоаттадеш. Цудухьа тахан республикерча ишколашка, берий бешамашка, дарбанчешка кхы а 3 эзар совгӀа моттиг хьаяьй», - тӀатехар вай мехкадас.
