Наьсарера моттигаш тоаярах бола болх бовзийт бахархошта
2025-гӀа шу доладелча денз, шахьар тоаеш дӀадихьа балхаш бӀаргадайт администраце бахархошта. ГӀашлой наькъаш дехкаш, хӀара денна куц тоадеш хувцамаш ду Наьсаре. Из хоам «Сердалога» бир мэре.
«Ялх бетта 5 км совгӀа гӀашлой наькъаш даьхкад. Эггара лоархӀамегӀа хета моттигаш я хьалхарча оагӀонца тоаяьраш- Арчакханаькъан, Радужни, Спортивни, Къоастой цӀерах дола урамаш, иштта МутаӀаланаькъан, Осканаькъан, Базорканаькъан, Московски оалараш», - йоах хоамо.
«ГӀаш леларашта паргӀато хила еза мехка. ГӀашлой наькъаш боаггӀача боараме хила деза, хӀана аьлча ишколе ухача берий кхерамзлен хьал, ха яхача наьха паргӀато царца ювзаенна я. ХӀара сагага кхоачаш бола болх ба оаха дӀаболабаьр», - белгалдир Оздой Руслана, цу гӀулакхах дувцаш.
Даьла денна бахархой дукхагӀа хулаш йолча Наьсаре, чӀоагӀа лоархӀаме да уж балхаш. Шахьарера хьакимаш цу оагӀонцарча болхлошца къахьегаш ба, из хьал тоаде гӀерташ.
