ГӀурбан деноех хоза цӀай хилар Эккажкъонгий-Юрта
09.06.2025 10:57
Юртарча культуран цӀагӀа, доккха цӀай дир Эккажкъонгий-Юртарча бахархоша. Из хоам «Сердалога» бир цу беркатеча гӀулакха хьалхаэттараша.
«ЛоархӀаме хьаьший санна, дийхадар цига бойла диса бераш, СВО доакъашхой бераш, халача хьале болча дезалашка кхувраш. Берашта юкъе дӀайихьар бусалба дин довзийташ йола викторина, иштта зӀамигача хьаьшашта довзийтар ГӀурбан ди хьаоттара истори. Мерза совгӀаташ дӀадекъаш, дог хьаьстар цига берий», - дийцар тха газетага.
Белгалде деза, цу беркатеча гӀулакха хьалхаэттар вай мехкада Келаматанаькъан Махьмуд-Ӏаьла волга, хӀаьта из чакхдаккхара болх культуран цӀенна, Наьсарен кхален администрацена тӀабиллабар.
