ГӀалгӀайчен бахархой «Турпалхой тешшаме бицбергбац!» яхача яхье дакъа лаца бех
Ер кӀира чакхдалале, ГӀалгӀайчен бахархой таро я «Турпалхой тешшаме бицбергбац!» яхача шоллагӀча кхоллама яхье дакъа лаца, яхаш, дийцар «Сердало» газетага ГӀалгӀай Республике гӀолла йолча «Даьхен Лорбой» ганза филиала зарбан болх лелабераша.
«Из дагадехад, Украине дӀахьош йолча лаьрххӀача тӀема операцен мугӀарашка лаьттача бӀухой, халкъа турпалхой цӀераш малхаяхара Паччахьалкхен ганза. ХӀанз цига дакъа лоацарий таро я, ийс даькъа юкъебоагӀаш хила, дӀадахача шера хинначул диазза дукхагӀа да из. Мехка ворхӀ шу совгӀа ха яьнна бахархой шоай начӀал гойта йиш йолаш ба «Турпалхочун дезал», «Сай дагахьа боча лелаю» яхача сочиненега, шоашкара дагаехача байташка, иллешка, сурташка, гойтама экскурсешка гӀолла. Шу чакхдоалаш, котбаьннарашта совгӀаташ лургда»,-аьлар хоамо.
Тхоца къамаьл даьчо яхачох, дӀадахача шера из болх вӀашагӀбеллараша 3000 дехар техкар, Россе 87 моттигерча викалаша дакъа лацара хьадайта хинна. Карарча шера из кхы а дукхагӀчар тӀаэцаш да.
