МагӀалбика кхален бахархоша, къахьегама шоаттан юкъе дакъа лаьцар
Ид-аль-Фитр (Мархаш) хьатӀадоагӀаш, МагӀалбика кхален бахархоша хьаллаьцар ГӀалгӀайчен кулгалхочо Келаматанаькъан Махьмуд-Ӏаьлас вай юкъарча цӀагӀа лостам бара нах тӀахьийха хилар, цудухьа уж арабаьлар аргӀанара республикан къахьегама шоатта ди дӀадахьа. Дикача гӀулакхо вӀашагӀтехар кхален администраце болхлой, ерригача урхалений викалаш, иштта кхален бахархой, бераш, боккхийбараш.
«Шоатта ди дӀадоладелар нах бахача цӀеношта гонахьара доазош цӀендарца. ДӀаьхача Ӏанна хьагулъенна нувхаш дӀаяьхар. Цул тӀехьагӀа доакъашхоша берий бешамий доазонашка лостам бир, гаьнашта кӀир техар, гӀандашта басар хьекхар. Хоза хет иштта юртахой оарцагӀбаьлча. Баркал оал аз кхален бахархошта, вай республика лостам болаш, цӀена хилар царна дезарах», - аьлар ше къамаьл деш «Сердало» газетага МагӀалбика кхален администраце кулгалхочо Къоастой Ӏаддал-Хьамида.
Белгалдаккха дезаш да, цу тайпарча кхетаченаша, лостам барал совгӀа, нах вӀашагӀтохаш хилар. Къахьегама шоатта дӀадахьарах, МагӀалбика кхале хозагӀа а цӀенагӀа а йийрзар, бӀаьсти хьатӀайоагӀаш.
