Пхьилекъонгий-Юрта шин дийнахьа белхий бир
Диъ дийнахьа салоӀаш долча хана, Наьсарен кхален Пхьилекъонгйи-Юрта шин дийнахьа белхий бе лаьрхӀар. Шоатта ди, кӀиранди хетадир Шолжа хин йистош цӀенъяра, юртара санитарни хьал тоадара. Къахьега арабаьлар тайп-тайпара ханаш яьнна нах, царна юкъе дукха дешархой бар. Юртхоша баь барт хьаллаьцар экологе, Ӏалама тароний Министерствос, шийна керте министр Мизенаькъан Микаил волаш.
ГӀалгӀай Республикан Ӏалама Министерствон зарбан болх лелабераша яхачох, хьалхарча дийнахьа йиъ КАМАЗАца 900 нувхий гали дӀадихьар.
Нувхаш гулъярал совгӀа, кхыдола балхаш а дир. Масала, гаьнашта доал дир: эшаш йоаца ткъовронаш дӀатийдар, гонахьа гомаш, кхыдола балхаш дир.
Шоатта ди дӀахьош да «Россе хиш» яхача, бердий йистош цӀенъяра йолча ерригроссийски болама чудоагӀаш. ГӀалгӀай Республикан Ӏалама Министерствос новкъостал дир эшаш болча гӀирсаца.
Белгалду, моттигерча бахархошта шоай юрт а гонахьара Ӏалам а дезаш хилар. Цу тайпарча кхетаченаша дикагӀа ду экологе хьал, Ӏаламца бехктокхамегӀа хулийт»,-аьлар Ӏалам лорадераша.
