Кхалсаг интернета чу (ӏnternet Women) яхача кхетаче дакъа лаца бех вай мехкахой
Таьрахьашца дувзаденнарех йолча Академе укх бетта 20-ча дийнахьа дӏаяхьа лерхӏача ӏnternet Women оагӏонцарча кхетаче дакъа лаца аьттув ба вай мехкарча кхалнаьха. Из хоам «Сердалога» бир «Ишкол 21» зарбан болх лелабераша.
«Шийтталагӏчох ах сахьат даьлча дӏайолалу кхетаче. Олиганаькъан Мадинас гулбеннарашта дувцаргда ӏT оагӏонца дувзаденнарех, хьакхеллача хьаькъала тахан вахаре дӏалоацача моттигах. Европерча балха, культурацарча лоархӏамедарашта хетадаь хургда Овшанаькъан Талифай къамаьл.
Гӏарбакханаькъан Лидайца доакъашхоша доашхаргда сайта гӏулакх дикка тоадарах болча SEO оагӏонца дувзаденнараш. Хамхой Асяс цига дувцарга ший дега тоам беш дола гӏулакх мишта дӏадахьа деза, йоккхача компанеша теркалвергволаш фу де деза. Хӏаьта Хьоашаланаькъан Раяс белгалдергда, моллагӏа хӏама хиларах, сабаре хургволаш лораде дезараш», - йоах тхогарча хоамо.
Из кхетаче вӏашагӏъеллараша теркалдечох, аьттонца шоай никъ дӏахьош болча кхалнаха хьалхадоахараш дикка накъадаргда ӏT оагӏонца къахьега болалурашта.
