ГӀалгӀайчен яхархочун ахча дайра, WhatsAppах тешар бахьан долаш
Наьсарен яхархо WhatsAppах тешарах, ахча доацаш йисар. Ший гаргарча сага цӀерах хоам бера цунга 21 эзар сом деза, аьнна, цхьаккха хӀамах кхы дегабуам а ца беш, ахча дӀадахьийтар цо шийна хьаяйтача чота тӀа. ТӀехьагӀа дагадехар цунна, гаргарча сагага телефон тоха, цунгара хайра ший WhatsAppа аккаунт йохаяьлга.
«Из Ӏехаяьча сага Россе УК 159 статьях дола зулам даьд. Из тохкаш я полици», - аьлар «Сердало» газетага ГӀалгӀай Республике гӀолла йолча Россе МВД.
ГӀалгӀайчен полицейскеша цкъа хьалхадаьккха Ӏийнадац, малав ца ховча сага Ӏеха а баь, наха ахча дӀадохьийташ нийслулга.
Цкъа хьалхагӀа, банкера чот шоаш дӀаювца оттале, тахка деза; оашош ахча дӀадохьийташ вола саг малав, шоаш Ӏехадой. Из ца дой, шоаш зуламхочун тийшача балха юкъедахалга халаш.
