Интернете гӏолла зизаш эца лаьрхӏача Магасерча кхалсага, тийшаболх бир
05.09.2025 13:03
Магасерча МВД оагӏон болхлой болча латкъа енача кхалсага дийцачох, интернете гӏолла зизаш эца енна тийшаболх хиннаб цунна. 101 хьармакхах латташ бола цӏов эца дагахьа 10 эзар сом ахча дӏатӏадахьийтад цо интернете; уж дохкаш ва ше, аьнна, бувзаме ваьннача сага; бакъда ахча каракхаьча зуламхо вайна дӏаваьннав.
Магасерча Россе МВД оагӏон болхлоша РФ УК 2-ча даькъа 159 статьях гӏулакх хьадийллад интернете гӏолла нах ӏехабеш, тийшаболх кхестабеча зуламхочоа. «Сердалога» из хоам МВД болхлоша бир. Полице болхлоша массаза санна кхайкарал ду бахархошка! Боккъал а ма ӏехадайта шоаш зуламхошка! Фийла хила, оашош леладеча хӏаман кӏеззига уйла е! Дӏа ма кхахьийта малашб ца ховча наха ахча.
