Даьла кхеле дӏайийрзача йиший ахча дихьар ӏаьдала духьалъоттаргья
16.12.2025 09:42
Еннача ший йиший ахча даар тӏатетташ йола кхалсаг лаьцар Наьсаре мехкарча МВД,моттигерча Росгварде оагӏон «Беркут-ЮГ» ОМОНа болхлоша. Из хоам «Сердалога» бир МВД зарбан болх лелабераша.
2024-ча шера Даьла кхеле дӏайийрзача йиший ахча диад, яхаш, тӏатетташ да тахан 42 шу даьннача кхалсага. Тохкама болхлоша белгалдечох, еннача йиший телефон, банковски карташ, иштта цун доалахьа хиннача хӏамах нийсса ах дӏадихьад цо.
300 эзар сом совгӏа ахча да банковски карташ тӏара дайнар. Полице болхлошка латкъа венар енначун цӏен-да ва, цо белгалдечох, из деррига хӏама цар кхаь бера да.
