Кхалсага яздечох, цхьаккха тайпара цунна тӀалатташ доаца 15 эзар сом ахча да газа оагӀон болхлоша хьатехар. Ахча хьатехача юкъа цун квартире саг ваьхавац, тоаеш лаьттай из, цунга хьежжа газ а йоагаяьяц. Из бакъдеш йола справка дӀахьекхача а кӀалхаръяьннаяц кхалсаг. Сага бокъонех волча викала из гӀулакх дикка техкар, гучадаьлар, ахча бокъо йоацаш цунгара дӀадехилга. Шоаш харцахьа тӀаоттадаь 14 эзари 279 соми ахча тӀера дӀадаккха дезаш хилар газа оагӀон болхлой.