Доккхача хатара бехке волча вахархочоа суд ергья
26.02.2025 16:54
Доккха хатар оттара бехке веш волча 51 шу даьннача вахархочун гӀулакх тохкаш ба тахан суде. Бокъо йоацача тайпара цо ший цӀагӀа газ дӀахоттарах сага вахар хаьдад. Из хоам «Сердалога» бир Ӏаьдала болхлоша.
«Тохкама болхлоша яхачох, 2013-ча шера бокъо йоацача тайпара керттерча газа турба тӀара ший цӀагӀа газ дӀачуйихьай цо. 2018-ча шера из гучадаьннача газа болхлоша турба Ӏохоадаяьяр, кхы дӀатӀа ма хотта, аьнна, соцам баь; бакъда цу сага из юха дӀатӀахеттай», - йоах хоамо.
2024-ча шера гуйран тӀехьарча бетта 29-ча дийнахьа газ ийккха урагӀдахача цӀагӀара кхо бер доагадаьд, 46 шу даьнна кхалсаг кхелхай. Цу хатара бехке волчун гӀулакх судо тохкаш латт.
