ГӏалгӀайчен вахархо Шоанахой Ваха хьакхайкаваьв, «2024 шерара дикагӀа вола тренер» санна
ГӏалгӀайчен вахархо Шоанахой Ваха хьакхайкаваьв; «2024 шера дикагӀа вола тренер ва», аьнна. Из ва ГӏалгӀай Республикан (ММА) вӀашагӀъийнача латара Федерацен президент, яхаш, хоам бу «Сердало» газетага моттигерча спорта Министерствос.
«ЛаьрххIа «ММА дикагӀбараш» яха вӀашагӀкхетар долаш, мехка дикагӀа бола тренераш белагалбир. Укх деношка, Москверча Россе ММА Союзо хьакхайкабир итта даькъах бола толамхой. Шин даькъе вай республика дикагӀчарех хилар. Шоанахой Вахах, шеко йоацаш, «Дӏадахача шерара дикагӀа вола тренер лаьрхӀар». Цул совгӀа, ГӏалгӀайчен вӀашагӀъийнача латара (ММА) Федерацена «ДикагӀа йола округа федераци» яха цӀи елар», - хоам бу газетага.
«Шоанахой Ваха цу Федераце кулгалхо хилар 2019-ча шера, из спорт вайцига дӀайолалуш мара йоацача хана. Къонача кулгалхочо республикан вIашагIтехача тоабан болх тоабир, цо кердаяьккхар ГӏалгӀайчен ММА. Дика тоабаш вӀашагӀъехкар, кийчон хьалаш а Ӏалашдир. ГӀалгӀайчен латархой а дика таронаш хилар, республикан дика кийчъяьча залашка шоай тренировкаш дӀаяхьа, иштта ерригача Россе тренирокашка аха. Цу тайпара дегӀадоагӀаш дола хьал теркал ца деш дисанзар Россе ММА Союзе… Аз даькъалавувц Ваха цу коталонца, дӀахо а иштта толамаш даха низ кхоачалба цун. Мехка спорта Министерство кийча я эшача из хьаллаца», - аьлар физкультуран, спорта министра Белхарой Руслана.
Тхоца къамаьл дийцачо яхачох, Шоанахой Ваха ва хӀанз ММА Россе гулъяьча ондаргий тоабан воккхагӀа вола тренер, «Сурхо» Республикан спортивни ишкола кулгалхо.
