Гӏалгӏай мехка 160 км совгӏа никъ, ворхӏ тӏий тоадаьд ялх шера
Тӏеххьарча ялх шера, Гӏалгӏайчен наькъаш тоадераша шоай толамаш дика дегӏадоагӏаш хилар гойтар. Болхлоша 160 километр совгӏа никъ тоабаьб, 63 вахара моттиг кердаяьккхай, ворхӏ тӏий меттаоттадаьд. Уж кердадахара керттера маӏан да республикан бахархошта вахара дика хьалаш хьакхоллар. Наькъаш кердадахар бахьан долаш, наьха вахар а тоалуш доагӏа, хӏара сага хьакхоачаш транспорт а я, моллагӏча моттиге ваха везарах сиха дӏакхоачаву, кхыметтел лоамашка ядача юрташка а.
«Уж хувцамаш де таро хилар Россе президента «Кхерамзлен дика наькъаш» яха проект хьаллацарах, иштта цунца «Цаӏ йола Росси» яхача парте «Вахара хьалаш» яха программа кхоачашъеш хиларах. Оаха дӏахьош ба республикан наькъаш тоадара бола болх, хӏана аьлча дика наькъаш - из лорий новкъосталга, дешарга, балха моттигашка, вахара гӏишлошка, кердача таронашка вугаш бола никъ ба. Къаьстта терко лоаттаю гаьна ядача юрташта. Вежарий-Юрта, Даьттагӏе дика наькъаш ӏодаьхкад. Цига бахача наха из йоккха вахара таро я: дукхача шерашка лерттӏа никъ боацаш баьхаб уж, къаьстта ара хаоттам хувцабелча, ваха-ва чӏоагӏа хала дар. Хӏанз уж моттигаш дикка тоалуш я. Наькъашца цхьана хьакхоллаш да вахара хьалаш - хьалъеш, кердайоахаш я ишколаш, берий бешамаш, культуран цӏенош, фельдшерско-акушерски пункташ, кхыйола наха эша моттигаш. Эккажкъонгий-Юртара ши тӏий тоадаьд, Илдарха-Гӏалий тӏа ши тӏий тиллад, иштта Юкъерча Ачалкхе, Шолже цхьацца гӏишлош хьалъяьй, Шолже - Гарагорск никъ ӏобиллаб», - аьлар ший телеграм-оагӏон тӏа Гӏалгӏайчен кулгалхочо Келаматанаькъан Махьмуд-Ӏаьлас.
Республикан Кулгалхочо белгалдир, наькъаш чӏоагӏа даьдий ховш хилар доккхий догӏаш дийлхача хана, аьнна. Хьалхалатта инженерни технологеш юкъеяхарах, наькъашкара хьал тешшаме хилар. Машинашта цхьаккха духьале нийсъяланзар, хӏаьта сиха гӏо ду лорий машинаш, нах кӏалхарбоахараш, коммунальни гӏулакха болхлой, хало а йоацаш, дӏакхаьчар баха безача.
Хӏанз Гӏалгӏайчен транспорта хьалаш хьакхоллаш да массайолча кхаленашка, цу юкъе лоаман моттиг йолаш. Вай заман наькъаш хиларо дика таро лу моттигера бизнес дегӏайоалае, туристий терко тӏаоза, экономика чӏоагӏъе, хӏара вахархочунна дика хьалаш хьакхолла.
