Хьалхарча аргӀагӀа, геттара терко тӀайохийтарех я Шолжа кхале, Илдараха-Гӏала, Шолже хьалъяь керда гӀишлош. Энергетикаша белгалду, ток  лоаттаяра Ӏаьдалца баь барт а боацаш, из къайлагӀа лелаеш хилар бокъонах доагӀаш доацилга. Шийгара ток   хьахетта хиларо, ток чӀоагӀагӀа хьачуозаш а, тӀакхеташ а, из тӀерайоалаш а моттигаш  нийсйолийт, тӀаккха цох шийна а наха а бала хул, цӀагӀара техника йохаш, цӀаьхха цӀи яьнна, нах бовш дукха моттигаш нийсъеннай. Говзанчаша яхар деш боацарашта, ток кӀезигагӀа лоаттаергья. Энергетикаша цу тайпарча 206 сага, цар из шоаш лелаеш хилар чӀоагӀдаь ца хиларах, ток дӀахоадайир.

Цхьан бетта, цу тайпара хьалаш гучадоахаш дӀабихьача балхо ший толамаш хьагойтар. Таханарча денга кхоачаш, хьайийллай 93 лицевой чот, кхы а 263 саг бартчӀоагӀам баь воалаш ва кастлуш. Цу тайпара, 356 къайлагӀа ток йоагаяьраш тӀакхийтар, - аьлар «Ингушэнерго» филиала кулгалхочо Бӏарахой Рашида. Тӏахьожам лоаттабара бола болх дӀахо дӀахьоргба. Ардара бетта энергетикий болх дӀахохьоргба кхыча юрташка: Наьсаре, Магасе, МагӀалбике, Наьсарен, МагӀалбика кхалешка». 

Шоаш из болх дӀахьоча юкъа, энергетикаша 184 хьаькъал дола гӀирс оттабаьб наха.

Белгалду, электроэнерги лоаттаяр чӀоагӀдеш, хьаелла еза лицевой чот, цу гӀулакха ваха веза шахьара, кхален токах йолча филиала доакъошка.

Иштта дика вӀашагӀбеллаб ток чуйиллара, бартчӀоагӀам оттабара  болх. Тайп-тайпарча наькъашца хьабе йиш йолаш ба из. Масала, «Лични кабинетага гӀолла» цаӀ йолча таронех(https://портал-тп.рф). Иштта тӀехьахьажа йиш я ший дехар мичахьа кхаьчад, маца кхоачашдергда. 15 кВт физически наха, 150 кВт- юридическичарна ток чуйилла кийча ба цигара болхлой.