«Ингушэнерго» оагӀон болхлоша 500 млн сом совгӀа декхар хьадийхар бахархошкара
«Къилбаседа Кавказ россеташ» «Ингушэнерго» яхача оагӀоно 2024-ча шерарча 11 бетта 259,8 млн сом декхар хьадехаш 2 788 иск чуеллар суде. Судо оттадаьчох, 502, 6 млн сом декхар да республикерча моттигаша, бахархоша хьатакха дезар. 482,9 млн сом декхар да тайп-тайпарча моттигашта тӀалаттар, 19,7 млн сом хьатакха оттабаьб судо бахархой.
Эггара чоалхане латт МУП «МагӀалбик-Водоконал» яхача оагӀон гӀулакх. 80, 6 млн сом декхар да таханарча дийнахьа цунна тӀалаттар, ГУП «Ингушрегионводоконал» яхача моттига тӀалаттар - 105,8 млн сом ахча. Искаш чутелаш, тока оагӀон къахьегамхоша дӀакхухьача балхах тахан 120, 2 млн сом декхар хьагулде аьттув баьннаб «Къилбаседа Кавказа россеташ» яхача оагӀон. Хьагулдеш дола декхар компане дӀадохийт тока моттигаш тоаеш, керда гӀирсаш увттадеш, иштта кхыдола цу мугӀарера балхаш чакхдоахаш.
Тока оагӀон болхлоша бахархошка дехар ду; тӀалатта декхар ханнахьа дӀале, яхаш. Суде иск чуенна дӀатокхаш хилча, дукхагӀа хул дӀадала деза ахча. Декхар тӀалаттараша ахча цхьаккха тайпара хьалуш ца хилча, судага гӀолла хьадаккха дезаш хул. Цу юкъе да декхар дукха гоадарах кхы а ахча тӀатохар; боахам, банкера счет лацар; алапе тӀара из ахча дӀакхахьар; декхар хьатекха валлалца Россера аравала бокъо ехкар. ТӀалатташ дола декхар дӀадала йиш я токацара болх дӀахьоча моттиге дӀаваха, «Сердал Онлайн» яхача оагӀон «Ший доалахьарча кабинетага» гӀолла.
