Центра чудоагӀача керттерча декхарех цаӀ да наха дарба дар. Цу гӀулакха укхаза хьайийллай тренажёрни зал, психологически паргӀатвалара кабинет, иштта къахьега моттиг. Цул совгӀа, цу урхалленна чудоагӀаш да кердача технологешца дарбаш дар, къаьстта наркотикашца дувзаденна дегӀа хьал дарашта.

Из лаьрхӀа я 150 сага, лазара корта гучабаккха керада гӀирс а ба. Цига кхалнаха а маӀача наха а лаьрхӀа йола моттигаш я, иштта берий психиатрически отделени, дийнахьа дарбаш ду моттиг, лаьрххӀа йола наркологически палаташ, халача лазарашта дарба дара моттиг а я.

«Пхьилекъонгий-Юрт кӀезиг-кӀезига лорий доккха дакъа хинна дӀаотташ латт, - укхаза болх беш я онкологически, кхайкора диспансераш, хӀаьта 2027 шера хьалъе лерхӀ керда поликлиника», - аьлар мехка кулгалхочо.

Из хьалъе йолаяьй кхы а 2015 шера, бакъда хьалъяь ца йоалаш тӀехьайисар из, болхлой цахилар бахьан долаш. Яь хинна чӀоагӀо йоха а яь, керда болхлой дӀаэттача, из гӀулакх дӀадахар, аьлар ГӏалгӀай Республикан Кулгалхочун, Паччахьалкхен зарбан болх лелабераша.

«Дикка къахьега дийзар, таро а ийшар уж балхаш йистедаха. Тахан, оаха доаккхал а деш, хьаел укх заман лорий моттиг, цо таро лургья бахархошта дика дарба де а, иштта керда балха моттигаш хилийта а», - аьлар Келаматанаькъан Махьмуд-Ӏаьлас. Цо тӀатехар, центре 400 совгӀа лорий болхло хургволга, царех 200 керда хьайийллача балха моттигашка къахьегаш хургва.