«ЦаӀ йолча Россе» депутаташа дӀахо а кхоачашду берий хьашташ
«Дагалоаттама корсам» яхача болама чудоагӀаш, депутаташа дикахетар дир берашта, цар хьашташ кхоачашдеш. Укх деношка кхо бер чӀоагӀа гӀаддигар, царна дагалаьттар кхоачашдарца.
ВорхӀ шу даьнна Маларой Аьсет я, лаьрххӀа йола тӀема операци дӀахьош веннача бӀухочун Маларой Мусай йоӀ, цунна елар планшет а иштта мерза даараш а. Итт шу даьннача Оздой Ӏаддала бихьар «Кокон» яха хехкалуш бола бурчолг, из цунна чӀоагӀа безаш бар. ХӀаьта зӀамигача Гайтанаькъан Ӏаддал-Малика цунна езаш хинна керда электромобиль ийцар.
«Из болам хиларах, вай мехкарча хӀаране таро йоацача берашта новкъостал де, цу берий дог хьаста йиш я», - аьлар ГӏалгӀай Республикан Халкъа Гулламе.
Белгалду, «Дагалоаттама корсам» яха болам дӀахьоргба, саькура бетта 28-ча денга кхаччалца.
