УнахцӀенон болхлой Денна хетаяь кхетаче дӀайихьар мехкарча депутаташа
16.06.2025 12:40
Халкъа Гуллама унахцӀенон оагӀон, вахара политикан, СВО доакъашхой, ветераний гӀулакхех йолча комитета йоккха кхетаче дӀайихьар, унахцӀенон оагӀонцарча болхлой Денна хетаяь. Эккажкъонгий-Юртарча юкъерча ишколе хилар вӀашагӀкхетар.
Парламента зарбан болх лелабераша белгалдечох, депутаташа Олиганаькъан Бадрудина, Хьаштаранаькъан Заьлмахас дипломаш, баркал оалаш каьхаташ делар наха дарба деш къахьегарашта.
Гулбеннача цу лоархӀамеча болхлошка къамаьл деш, Олиганаькъан Бадрудина белгалдир, цар дӀахьор эггара лоархӀамегӀа бола болх болга, доккха баркал кхайкадир бехктокхаме шоай моттигашка къахьегаш хьабоагӀарашта. Иштта баркал аьлар, из кхетаче лакхача боараме вӀашагӀъеллача ишкола болхлошта.
