Чкъаьрий, токацара кхерамзле лораеш, мишта лувца деза дувц тока оагӀон болхлоша
Чкъаьрий лувцар токах лоралуш дӀакхахьа дезилга хьалхадоах тахан бахархошта « Къилбаседа Кавказа россетий» - «Ингушэнерго» филиала болхлоша.
Цу оагӀонца дувзаденнараш довзаш, теркалдеш хила беза чкъаьрий лувца арабувлараш. Тока саьргаш долхача моттига кӀалха, царна гарга чкъаьрий лувца Ӏохувша йиш яц! Чкъаьрий лувцаш дола зӀак вӀашкадилла дӀадахьа деза тока саьргашта кӀалгӀолла дӀаводача хана. Ди детташ, тӀоа сегаш хаоттам хуле, Ӏалаьмате чехка гаьнавала веза цу моттигашта. Хиво ток тӀаоз, 100 метрага кхаччалца дола доазув да ди тохаро чулоацар. Ӏолийга дадача тока саьргех кулг тоха йиш яц, бархӀ метр гаьна хила веза царна.
«Чкъаьрий лувцараша уж хӀамаш лорацадар чӀоагӀа кхерме да, саг вала а йиш йолаш. Масала, лаьттани тока саьргаштеи юкъе эггара кӀезигагӀа ялх метр хила еза, хӀаьта таханара чкъаьрий лувца зӀакаш дуккха дӀаьхагӀа да. Цул совгӀа, чкъаьрий лувца зӀакаш хьадаь хӀама геттара чӀоагӀа ток тӀаозарех лоархӀаш я, цудухьа тока саьргашта цхьа метри ах метри зӀакаца гаргавахар е цаховш из дӀахьокхадалар цу сага шийна меттел, гонахьа мел барашта а ток тохийташ да»,- дийцар «Ингушэнерго» филиала кулгалхочун декхараш кхоачашдеш волча Котаганаькъан Кимрана.
Тока оагӀон болхлоша хьалхадоаккх, нагахьа шоашта бера чкъаьрий лувца зӀак дала дагадехадале, малагӀча моттигашка чкъаьрий лувца Ӏохувша йиш яц дӀахьеха дезилга. Нагахьа из хӀама лорадеш боацараш оашош зийнабале, дӀатӀадахе бехк баккха, хьалхадаккха царна, хила тарлуча хатарах саг лораваьргаш хургда шо.
