Наьсарен моттигаш мишта тоаю хьежар Мехкада
Шахьара моттигаш тоаярах йолча къаман проектага гӀолла, тоаеш латтача Наьсарерча моттигашка хьежар вай мехкада Келаматанаькъан Махьмуд-Ӏаьла. Республикан кулгалхо ваха хилар Малсаганаькъан КӀарцхала цӀерах йола парк, шахьарера Ӏам, Коталон аллей, иштта Лермонтов Михаила, Базорканаькъан Идриса цӀераш лелаеш йола сквераш тоаеш дӀахьош латтача балхашка хьажа.
«Наьсаре тоалуш йоагӀа. Шахьара мэра хьинаре къахьегаш хилар тахан хоалуш да. Хувцамаш гуш да дӀа-хьа хьежача, хӀаьта дӀахо дӀабахьа беза болх а кӀезига бац», - белгалдир Макшарипа Махьмуд-Ӏаьлас. Коталон аллеяга хьожаш Мехкадас теркалдир, къаьстта из моттиг боккха лоархӀам болаш хилар. Бахархой паргӀатта салаӀа, ха дӀаяхьа аьттув хургболаш, дегӀа могашал эшаеннарашта цига ха яккха паргӀата хургйолаш, деррига теркаме лоацаш вӀашагӀъеллай из тоаярах йола дизайн-проект.
«МоллагӀча ханага кхаьчача наьха салаӀа, цига ха яккха безам хургболаш меттайоалаеш латт оаха еррига моттигаш. Из теркалде йиш я Малсаганаькъан цӀерах йола парк тоаеш дӀахьош бола болх зийча», - аьлар мехка Кулгалхочо. Шахьарий, юртий моттигаш тоаеш, къахьегар тахан чӀоагӀа лоархӀаме долга белгалдир цо.
Цудухьа цу оагӀонцарча федеральни проекташка дакъа лоацаш хила беза моттигашкара хьакимаш, проекташа гранташ йоахаргйолаш. Белгалде деза, ер шу доладелча денз, Наьсарерча моттигий куц эргадоаккхаш дӀахьош латтар боккха болх болга. ГӀашлой наькъаш тоадеш, тишъенна хин турбаш хувцаш, керда лампаш йогӀаш, машинаш лела наькъаш дехкаш, тока хьал меттаоттадеш къахьегаш ба шахьаре, дикка гаьнабаьнна.
