«МВД болхлоша шоай декхараш бехктокхаме кхоачашдарах, теракт е лаьрхӀача зуламхоша вӀашагӀделлар дохадир тахан. Шолжа кхалерча кераста наьха киназа чу чухьалха лаьрхӀа хиннаб терроризм яхача зуламах латтача тоабан ялх доакъашхо. Дукха ха йоацаш, мозгӀар, Ӏаьдала 15 болхло вувш Селий мехка даьр санна зулам де лаьрхӀа хиннаб уж республике», - аьлар мехкадас Келаматанаькъан Махьмуд-Ӏаьлас.

Мехка кулгалхочо белгалдир, цхьаккха тайпара ди бовзаш боацача кагирхоша, зуламхой тоабах дӀабетталуш, шоай даьшка, ноаношка ла ца дувгӀаш, гаргарча наха духьалбувлаш, адамашта юкъе доккхий хатараш доаржадеш хилар.

«Беркатеча, дикача, барт боаржабеча гӀулакхашта нах тӀахьехаш; хьехар ду вай дийшача наха хӀара денна. Цар дувцар хьаэца деза кагирхоша, малашб ца ховча, вай мехкара цхьоагӀо йохаеча наьха «имамашка» ла ца дувгӀаш. Даьшта, ноаношта ха деза, шоай дезал мичахьа лел, хьанца хьоашал леладеш, къамаьл доагӀаш ба.

ЛерттӀа доал ца дойя, цхьан дийнахьа шоай цӀенъюкъе, берригача мехка доккха хатар тӀадена дехкебоахаргба цар уж. ХӀара даь, наьна декхар да шоаш кхебаьрашта тӀехьа тӀахьожам лоаттабар, уж наха балийна цабалийтар»,- белгалдир вай Мехкадас.

Мехка кулгалхочо, кхетам болаш, фийла хилара тӀахьех берригаш. Къаьстта хӀанз; вай мехкара хьал толхаде, кегаде гӀертараш баьржача хана; чӀоагӀа терко е еза цу гӀулакха. Къилбаседа Кавказе лех зуламхоша шоаш дагалаьца бӀеха хӀама доаржаде наькъаш.

Теракта духьале яь, дуккха нах кӀалхарбаьхарашта; доккха баркал кхайкадир Мехкадас.