РФ Совбеза кхетачен юкъе, дакъа лоацаш хилар вай Мехкада
Нальчике, Шойгус кулгал деш, дӀайихьача РФ Кхерамзлен Совета кхетаче дакъа лоацаш хилар вай мехкада Келаматанаькъан Махьмуд-Ӏаьла. Из хоам «Сердалога» бир Мехкадаь зарбан болх лелабераша. ВӀашагӀкхетаре дакъа лоацаш вар СКФО гӀолла вола РФ Президента массазара викал Чайка Юрий, иштта СКФОна чуйоагӀача моттигий кулгалхой, кхыбола Ӏаьдала болхлой.
Кхетаче дийцар, маьрша вахар дохадеш, нах тувлбеш даьржача зуламех. Тахан, малхбузера мехкаш дин, къамаш къестадеш, Россе гӀулакх толхаде, кегаде гӀертача хана, къаьстта чӀоагӀа лоархӀаме да цу хӀамашта духьалара болх дӀабахьар.
«Интернета оагӀонашка гӀолла адам кегадеш дола гӀулакх даггара даржаш долга кхетаде деза вай массане. Харцдар, бакъдар къоастаде ховш, фийла хила деза вай.
Къаьстта йоккха терко йир кхетаче кагирхошта, хӀана аьлча хӀетта кхийнараш, кхувш латтараш кегабе, тувлбе аттагӀа да зуламхошта, цар кхетам дикка чӀоагӀбенна цахиларах. Даьхен гӀулакх массахана лораде дезилга, ший мехкацара безам чӀоагӀбе безилга хьалхадоахаш кхее еза тӀехье», - белгалдир Мехкадас цу кхетачех дувцаш.
ВӀашагӀкхетаре гулбеннараша терко йир къамаш къестадеш, Россе бахархошта юкъе цатоамаш, гоамал, хийрал йоаржаеш долча гӀулакхашта. Из во доаржадеш леларашта духьала къовсам лоаттабеш, цар наькъаш тедаш, болх лоаттабе беза хӀара моттиго.
Дукха къамаш чудолхаш йолча Россера машар, цхьоагӀо лораяр тахан вай массане лоархӀамеча декхарех да. Цу берригача балха керттердар - наьха вахара хьал, экономика, иштта кхыдола мехка лоархӀаме оагӀонаш лакхача боараме хилийтар.
