Наьсарерча мэре кхетаче дӀахьош хилар вай Мехкада
ЛоархӀаме кхетаче дӀахьош хилар вай мехкада Келаматанаькъан Махьмуд-Ӏаьла Наьсаре. Боккха болх дӀахьош, шахьар тоаеш латтача моттигашка хьежар мехка Кулгалхо, тӀаккха кхетаче йир администраце болхлошца. 2025-гӀа шу доладелча денз, вахара-экономически оагӀонца хиннача хувцамех дийцар цига.
Шахьара Прокуратуро, моттигерча хьакимаша къахьегаш, йоал ийеча оагӀонцара, йоал юкъе йоацача тайп-тайпарча моттигашкара шахьаре хинна пайда 15%-га кхоачаш айбеннаб (дӀадахача шерга хьежача, 20,3 млн сомага кхоачаш да из). Цул совгӀа, тӀалатташ хинна кредит 101,8 млн сомага кхоачаш Ӏолохде аьттув баьннаб. Суде гӀолла дӀабихьача балхаца а дикка толам хиннилга белгалдир Мехкадас: 2 гектар совгӀа дола лаьтта юхадерзадаьд шахьара доалахьа, 28 млн сомах дола 60 гӀулакх дувца дӀачудахьийтад. Иштта цо теркалдир, базарашта тӀахьожам чӀоагӀбе безилга.
«Шолжа шахьарерча базар тӀа хиннар мо дола хатар кхы хилийта йиш яц. Кхерамзлен хьал лорадеш боацаш къахьегарий гӀулакх соцаде, хӀама йохкача ерригача моттигаша боаггӀача боараме йоал тела еза, из хӀама теркаме эца», - белгалдир Макшарипа Махьмуд-Ӏаьлас. Шахьара моттигаш лостам болаш, баьццаръерзаяь хилара боккха теркам бир мехка Кулгалхочо. Ӏам бола моттиг тоаяь яьлча, къаьстта хоза хургда шахьара куц, аьнна, белгалдаьккхар цо.
«Туристически наькъашта юкъе дӀачухьо еза тоаяь керда моттигаш, вай мехка ма хулла дукхагӀа туристаш тӀалаттаргболаш», - белгалдир Келаматанаькъан Махьмуд-Ӏаьлас.
