ЦӀий дӀачутелача станце хилар Лакхерча суда болхлой
Россе цӀий дӀачутеларий Халкъашта юкъера ди, Коталон 80 шу дизар хьатӀаотташ, республикерча цӀий дӀачутелача моттиге баха хилар Лакхерча суда болхлой. Из хоам «Сердалога» бир Лакхерча суда зарбан болх лелабераша. ЦӀий дӀачутелараша селхан ши болам дӀабихьар станце коа. Россе цӀий дӀачутеларий Халкъашта юкъера ди хьатӀаотташ, «Хьалсага хьай дог» яха болам юкъебаьккхар.
«Дикача наьха клуб» яхача ганза болхлой ба цу гӀулакха хьалхалаттараш, иштта дӀахьош ба ерригача Россе «ЦӀий дӀачутеларий код. Даьхен лорбой» яха болам. Даьхен лорбой шера, Коталон 80 шу дизара хетабаь ба болам. Цу гӀулакха хьалхалаттар - ТӀехкацара тӀум, цӀий дӀачутеларах йола РФ Юкъарлон палатацара болх нийсача лостамагӀа дӀабохийта Кхел, Федеральни оагӀонцара лорий-биологически агенство (ФМБА), унахцӀенон хьал хьаллацарах йола Къаман ганз, Россера ЦӀе ЖӀарг.
Из беркате гӀулакх хьаллаца арабаьлар Лакхерча суда болхлой - суда кулгалхочун гӀонча ЦӀелой Элина, суда моттигашта кулгал деш бола Янданаькъан Адам, Янданаькъан Хизар. ХӀара шерарча тушола бетта 20-ча дийнахьа дезду цӀий дӀачутеларий ди. 2007-ча шера, саькура бетта 20-ча дийнахьа соцам баь, юкъеяьккхай из лоархӀаме моттиг.
«Даьхен лорбой» яха болам Россе бахархой цӀий, тӀехкацара тӀум дӀачутелара тӀахьехаш ба. ТӀема ханашка цӀий дӀачутелаш хиннараш дагалоацаш, исторецара лерхӀам лелабу; дикача, наха пайдане хургдолча хӀаманна адам тӀахьехаш болх ба из.
