ГIалгIайче хьалха санна бераш дара даькъе хьалхарча кхаьннена юкъе я
ГIалгIай мехка, Росстата беча хоамах, российски доазонашта юкъе кхоалагIа моттиг дIалоацаш я, нах тIакхеташ хилар теркалдича. 2024 шера наджгоанцхой беттагара лайчилла беттага кхаччалца, тIакхийттараш 5,5 эзар саг ва, из я 10,3%.
Цу юкъе, иштта дика хьал этта хиларга хьежжа доацаш, нах кIезигагIа хулаш а боагIа, бIарччача мехка юкъарча хьалага диллача 161,9 эзар саг. Россе Президента Путин Владимира белгалду, дегIаахар дукхагIча даькъе тийша да юкъарлоно дезал хьаллоацаш хиларах, иштта дезалера мах бараш лорадеш хиларах.
«Белгалдаккха лов, гIалгIай фусамаш массаза а дезал дукха болаш хиннилга. Цул совгIа, Россе Президента берашта луш долча пособеша а бераш дара хьал аттача доаккх. Из дика новкъостал да кхоъ а кхы дукхагIа а бераш долча дезалашта. ХIаьта вай цу тайпара фусамаш я 30 эзар совгIа», - аьлар мехка кулгалхочо Келаматанаькъан Махьмуд-Iаьлас.
Цо иштта республикан бахархой тIахьийхар, дукхача дезала Iадат хьаллацара. Цо белгалдир, бераш – уж, къаман дезагIа долча хIамаех хинна ца Iеш, цун кхоане а хилар.
