ГӏалгӀайчера дӀабихьар 9 тонн гаргга юртбоахама химически молхаш чухинна гӏирс
Мехка экологически хьал лорадара йолча программа болх дӀахьош, Россельхозцентра ГӏалгӀай филиала болхлоша, республикан юртбоахама товараш арахецарашца цхьана, карарча шера шо-шоай йиллача хана гул я яь, лаьрххӀа чакхъяхара дӀаяхьийтар 8,94 тонн даьсса агрохимически гӏирсаш. Цох дийцар «Сердало» газетага ГӏалгӀай Республикан юртбоахама Министерстве.
Боахамо яхачох, (ХСЗР) баьцовгӀашта етта молхаш чухинна гӏирс массазара нувхаш санна лоархӀаш бац, из нийса дӀайоаккхаш ца хиларо лаьтта а, иштта гонахьара хий а бӀехду, экологена дикка зе ду, из ший аргӀагӏа сага унахцӀенон Ӏаткъаш хул.
«Цу тайпара, молхаш чухинна доассаденна гӀирсаш гулдеш, уж дахьа дезача дӀахьош болх бу ГӏалгӀай Республике гӀолла йолча Россельхозцентро, 2020 шера денз. Цо таро лу юртбоахама предприятешта ма дарра кхоачашде Ӏалам лорадаро дӀадехаш дар. Уж чакхъяхара болх дӀахьош я «Инвестагропром-Юг» ООО лицензи йола компани, цо тешшаме кхерамзлен Ӏалашо йолаш уж дӀахьу. Цул тӀехьагӀа, дӀаяьха хилар чӀоагӀдеш дола каьхат хьалу», - аьлар республикан юртбоахаме.
