Шолжеи Илдарха-ГӀалеи, моттигаш тоаярга диллача, хьалха латт
Мехкара моттигаш тоаеш дӀахьоча балха юкъе, эггара хьалхарча мугӀаре латт тахан Шолжа-Шахьари Илдарха-ГӀалеи. ХӀара шахьаре, дикка кулг тохаш, тоаяь моттигаш йиъ я. Шахьара моттигаш тоаяра федеральни проекта чуйоагӀача вахара хьал меттадоаладарах йолча къаман проектага гӀолла дӀахьош лоархӀаме болх ба из.
Мехкадаь зарбан болх лелабераша белгалдечох, карарча хана тоаяь яьннараш 23 моттига юкъера 11 моттиг я. Цхьацца йолча моттигашкара болх йиллача ханал хьалха чакхбаьккхар. Вай мехкадас Келаматанаькъан Махьмуд-Ӏаьлас белгалдир, болх дӀаболабаь ворхӀ шу дола къаман проект моттигий куц тоадара тӀехьа чӀоагӀа беркате йолга.
«Юха ца а совцаш, дӀахо болх дӀабахьа беза вай хьинаре. Вайх хӀаранена хозгӀа, дикагӀа, беркатегӀа хулаш латт беза мохк хӀара денна», - теркалдир республикан кулгалхочо.
